छठ पर्वमा प्रयोग हुने सामग्रीको मूल्य आकासियो
गोलबजार, १९ कार्तिक । छठ पर्वका अवसरमा उपयोग गरिने वस्तुको मूल्य आकासिएपछि उपभोक्ता मारमा परेका छन् । छठ पर्वमा प्रसादको रुपमा प्रयोग हुने केरा, नरिवल, उखु, मुला, कागती, स्याउ, सुन्तला, सख्खरका साथै बाँसबाट बनेको नाङलो, कोनियाँ र माटाको भाँडाकुडालगायत समानको मूल्य झन्डै तीनगुणा बढेको छ ।
यस्ता सामग्रीको मूल्य बढाइए पनि त्यसको नियन्त्रण गर्न सम्बन्धित निकायले कुनै चासो नदेखाएको स्थानीयवासीको गुनासो छ । चाडपर्वको मौका छोपेर बजारमा व्यापारीले सामानको मूल्य मनपरी ढङ्गले बढाइए पनि अनुगमन गरी कारबाही गर्ने निकाय मुकदर्शक बनेको सिरहा नहरा रिगौलका शंकर यादवको आरोप छ ।सूर्यको अराधना गरी मनाइने यो पर्वको तयारी सिरहामा तीव्र भएको छ । विजयदशमी र दिपावली सकिएपछि स्थानीयवासी छठ पर्वका लागि ताल तलाउ, खोला र नदी सरसफाइ गर्न र पूजाघाट बनाउन व्यस्त भएका छन् । उनीहरुले सिरहाको प्रमुख जलाशय, पोखरी किनारमा पूजाघाट बनाएर सजाउने कामलाई तीव्रता दिएका छन् ।
त्यस्तै ‘नहाय–खाय’सँगै पवित्र छठ महापर्व शुक्रबारदेखि विधिवत सुरु भएको छ । आउँदो सोमबार उदाउँदो सूर्यलाई अर्घ प्रदान गरी चार दिवसीय छठ महापर्व सम्पन्न हुनेछ ।
व्रतालुहरु शुक्रवार पवित्र जलाशयहरुमा स्नानगरी चोखो खानेकुरामात्र खाएका छन् । पर्वको दोश्रो दिन शनिवार व्रतालुहरु दिनभरि उपवास बसी राति गुलीयो पुरी, खीर, नून नहालेको तरकारी खाने छन् । जसलाई स्थानीय भाषामा ‘षडना’ भनिन्छ । षडनापछि निराहार व्रत बस्ने व्रतीहरु आईतबार संझुका–अर्घ अर्थात् सन्ध्याकालीन सूर्य पूजा तथा सोमबार बिहान सूर्योदयसँगै अर्घ प्रदान गरी यस महापर्वलाई समापन गर्नेछन् । तत्पश्चात व्रतालुहरु अन्न जल ग्रहण गर्नेछन् ।
यस पर्वमा केरा, नरिवल, ऊखु, सुन्तला, निबुवा, बेसार, चामल र गहुँको आँटा तथा सख्खरबाट निर्मित ठकुवा, भुसुवा, पिरुकिया, गुणालगायतका पारम्परिक परिकारहरु प्रसादको रुपमा चढाइन्छ । पूजा सामग्रीहरु स्थानीय स्तरमा निर्मित माटाको भाँडो तथा बाँसको टोकरी, कनसुपती आदिमा राखेर पूजा स्थलसम्म पुर्रुयाइने हुँदा यी सामानहरुको बिक्री अहिले उत्कर्षमा छन् ।छठ पूजा आयोजन हुने गंगासागर, धनुषसागर, अंगराजसर, महाराजसागर, दूधमती, जलाद, कमलालगायतका तलाउ तथा नदीहरुलाई साज श्रृंगार तथा सफा गरिएको छ । भारतीय राष्ट्रपतिको जनकपुर भ्रमणलाई लक्षित गरी विगत केही दिनदेखि थालिएको विशेष सफाई अभियानका कारण पनि अहिले जनकपुर सफा देखिएको छ ।
गंगासागर छठ पूजा समिति, जानकी सेवा समाज, गणेश युवा क्लवसँगै सेभ द हिस्टोरिकल जनकपुर, रेल्वे स्टेशन युवा समाजलगायतका संघ संस्थाहरु पोखरी तथा नदीहरुलाई सफा गर्ने काममा जुटेका छन् ।
भिक्षाटन गरेर पर्व मान्नु यहाँको पुरानो परम्परा हो । तर यस परम्परालाई दुरुपयोग गर्दै अचेल केही पेसेवर मगन्तेहरु छठको नाममा भिक्षाटन गर्न थालेका छन् । जनकपुरकी एक गृहणी संगीता देवीले भनीन, ‘अहिले दिनमा १०ः१५ जना मगन्ते भिख माग्न आउँछन् । असली व्रती भने अति थोरै हुन्छन् ।’
