कमलेश कुमार यादब
सिरहा, १८ कार्तिक । सिरहाको चोहर्वास्थित श्री गोरख गणले आज विहिवार आयोजना गरेको खुल्ला रक्तदान कार्यक्रम सम्पन्न भएको छ । शुभ दीपावली तथा छठ पर्वको अवसरमा आयोजना गरिएको रक्तदान कार्यक्रममा ४५ जनाले रक्तदान गरेका छन् ।
सिरहा, सप्तरी लगायत पूर्वका जिल्लाहरुमा पछिल्लो दिनमा रगत अभाव भएकाले सेनाले रक्तदान कार्यक्रमको आयोजना गरेको गणपति प्रमुख सेनानी मनोज भण्डारीले जानकारी दिए । उनका अनुसार २९ जना नेपाली सेना, ११ जना सशस्त्र प्रहरी, तीन जना जनपथ र दुईजना सर्वसाधारणले रगत प्रदान गरेका छन् ।गणपति भण्डारीले रगत दान गरी आरम्भ गरिस्को कार्यक्रममा अठार वाहिनीका वाहिनी पति सहायकरथी सुवर्ण वहादुर शाहको उपस्थिति रहेको थियो ।
रक्त संकलन कार्यक्रमा नेपाल रेडक्रस सोसाइडीले प्राविधिक सहयोग प्रदान गरेको छ । संकलित रगत सोसाईटी सिरहा शाखालाई जिम्मा लगाइएको आयोजकले जनाइएको छ ।
सिरहामा वार्षिक करिव दुई हजार पाउण्ड रगत खपत भइरहेको छ । यद्यपि यस सिजनमा चाडपर्व एवम् मौसम प्रतिकुलताको कारण रगत दिने मानिसहरुमा कमी हुने गर्दा अभाव भएको नेपाल रेडक्रस सोसाईटी सिरहा शाखाका सभापति राजदेव यादवले जानकारी दिए ।
