युवकको शव भेटियो, विदेश जाने सपना अधुरै

प्रकाशित समय 5:04:00 PM

सप्तरी, ९ असार । सप्तरीको पश्चिमवर्ती सुरुङ्का नगरपालिका– ३ दौलतपुर विषनरियाको बाँझो खेतमा एक युवकको शव भेटिएको छ । शव स्थानीय बरीलाल मण्डलका जेठो छोरा १९ वर्षीय फूलचन कुमार मण्डलको रहेको इलाका प्रहरी कार्यालय भेडियाले जनाएको छ ।
मण्डलको शव घरदेखि मुस्किलले तीन सय मिटर उत्तर पश्चिमस्थित स्थानीय भोली माझीको बाँझो खेतमा भेटिएको हो । मण्डलको शव गञ्जी, कट्टु मात्र लगाई उत्तानो परेको अवस्थामा भेटिएको छ । बाँझो खेतमा शव भेटिएको भन्दै बिहान सवा ६ बजेतिर स्थानीय बासिन्दाले खबर गरेपछि प्रहरीले घटनास्थल पुगेर घटनास्थल प्रकृति मुचुल्का उठाएको थियो ।
प्रहरीका अनुसार शवको छेउमा नाम नभएको विषको बट्टा समेत भेटिएकाले आत्महत्या भएको हुन सक्ने आशंका गरिएको छ । यद्यपि पोष्टमार्टमको प्रतिवेदन प्राप्त भएपछि मात्र मृत्युको कारण यकिन गर्न सकिने जनाइएको छ । शवको कुनै पनि भागमा आलो घाउ चोटपटक, निलडाम नभेटिएकाले बढी आत्महत्याकै आशंका गरिएको छ ।
विदेश जाने सपना अधुरै
सामान्य आर्थिक अवस्थामा मण्डल बुधबार साँझ गाउँ नजिकै रहेको कडहर्वा बजारमा चार÷पाँच जना साथीहरुसँग चटपटे खाएर ‘घर जान्छु भन्दै फर्किएको भाई गुलचन मण्डलले बताए । उनी वैदेशिक रोजगारीका लागि खाडी मुलुक कतार लागेका थिए । भिसा समेत आइसकेका कारण उनी एक हप्तापछि कतार जाने तयारीमा थिए । ‘विदेशबाट कमाएर फर्किएपछि विवाह गर्छु भन्थे, स्थानीय गाउँलेहरुले सुनाए । विदेश जाने अन्तिम तयारीमा रहेको शव भेटिएपछि परिवारमा रुवाबासी चलेको छ ।

सम्बन्धित समाचार

नयाँ
« Prev Post
पुराना समाग्री
Next Post »