काठमाडौं, ४ साउन । बढुवा सिफारिसमा परेका विवादस्पद डीएसपी सञ्जीव शर्मा दासलाई गृह मन्त्रालयले बुधबार निलम्बन गरेको छ । बढुवाको सिफारिस गरेको प्रहरी प्रधान कार्यालयले नै अलोचना बढेपछि निलम्बनको सिफारिस गरेको हो । उनलाई रामेछापका प्रहरी प्रमुख रहेको बेला एक किशोरीको बलात्कार पछि हत्याको घट्नामा लापरवाही गरेको आरोप लागेको छ । यसअघि दासमाथि कारबाही गर्न मध्यक्षेत्रीय प्रहरी कार्यालय हेटौंडाले राय दिएको थियो । २०६८ माघ ५ मा रामेछापको साबिक सैंपु गाविस १ सिरिसे, कवैटारकी १४ वर्षीया सुन्तली तामाङको बलात्कारपछि हत्या भएको थियो । त्यतिबेला जिल्ला प्रहरी प्रमुख रहेका दासले महिनौंसम्म घटना अनुसन्धान अघि बढाएका थिएनन् । प्रहरीले मुख्य अभियुक्त श्याम राउतलाई पाँच वर्षपछि गत असार ११ मा भारतबाट पक्रेर ल्याई काठमाडौंको महेन्द्र पुलिस क्लबमा सार्वजनिक गरेको थियो । त्यस क्रममा मध्यक्षेत्रीय प्रहरी कार्यालयका प्रमुख डीआईजी गणेश केसीले घटना अनुसन्धानमा प्रहरीले गम्भीर गल्ती गरेको भन्दै त्यसमा संलग्नमाथि कारबाही हुनैपर्ने बताएका थिए ।
