कुराकानीका क्रममा एमाले नेताहरुले अहिलेको संशोधन प्रस्ताव फिर्ता गरेर सहमतिका आधारमा अर्को प्रस्ताव ल्याउनुपर्ने धारणा राखेको उनले बताए । ‘संविधान संशोधनका लागि एमालेसँग कुरा गर्नुपर्छ भनेर मैले सरकारलाई भनेको छु । हामी पनि एमालेका बिभिन्न स्तरका नेताहरुसँग कुरा गरिरहेका छौ, ’ उनले भने,’ आवश्यक प¥यो भने म पनि एमाले अध्यक्ष केपी ओलीसँग ‘वान’टु‘वान’ कुरा गर्न तयार छु ।’
स्थानीय तहको दोस्रो चरणको निर्वाचन अगाडि राष्ट्रपति कार्यालयमा प्रधानमन्त्रीको उपस्थितिमा एमाले अध्यक्ष ओलीसँग भेट भएको उनले बताए । ‘राष्ट्रपति कार्यालयमा भएको भेटमा मैले ओलीलाई संविधान संशोधन भएन भने सबैलाई नोक्सानी हुन्छ । त्यसको सबै दोष एमालेलाई जान्छ त्यसैले संविधान संशोधनमा सहयोग गर्न पर्छ भनेको थिए,’ महतोले भने,‘जवाफमा ओली हाँस्नुभयो मात्रै केही भन्नुभएन ।’ एमाले र त्यसको नेतृत्वले संविधान संशोधनका लागि राजपाको आग्रह र ‘सम्मान’ खोजेको भए त्यसका लागि समेत राजपा तयार रहेको उनले बताए ।एमालेको मुख्य चासो पाँच नम्बर प्रदेश टुक्राउन नदिने रहेको भन्दै उनले अहिलेको संशोधनमा यो विषय नरहेकोले संशोधनमा सहयोग गर्नुपर्ने बताए । एमालेका कारण संविधान संशोधन हुन नसके आफूहरु यही एजेण्डा लिएर जनतामा जाने उनले बताए । कसैले आग्रह नगरे पनि एमालेले संविधान संशोधनका लागि एकतर्फी रुपमा सहयोग गरेर आफूलाई लागेको ‘मधेस विरोधी’ पार्टीको आरोप हटाउनुपर्ने उनको भनाई छ ।
राजपाबिना तेस्रो चरणको निर्वाचन नहोस
महतोले तेस्रो चरणको निर्वाचनमा राजपालाई बाहिर नराख्न सरकारसँग आग्रह गरे । प्रधानमन्त्री र माओवादी केन्द्रका अध्यक्षले समेत आठ,दश दिनभित्र संविधान संशोधन, स्थानीय तहको संख्या थप्ने, मुद्दा फिर्ता लगायतका माग पुरा गर्ने प्रतिबद्धता जनाएकोले त्यसलाई पुरा गर्नुपर्ने उनले बताए ।
‘दुई चरणको निर्वाचन भइसकेको छ। तेस्रो चरणको मिति सारिएको छ,’ उनले भने,‘ तेस्रो चरणको निर्वाचनमा हामीले भाग लिने वातावरण बनोस । यो दुई तीन महिनामा समस्या समाधान गरेर मात्रै अशोज २ गतेको निर्वाचन होस भन्ने हाम्रो विनम्र अनुरोध छ ।’
सरकार निर्माणका लागि गरेको कोशीश संविधान संशोधनका लागि गर्न सके दुई तिहाई पुग्ने उनले बताए । प्रधानमन्त्री बन्ने क्रममा प्रधानमन्त्री शेरबहादुर देउवाले ३ सय ८८ मत पाएका थिए । राजपाका तीन जना सांसद र कांग्रेस–माओवादीका छ जना गरी ९ जना सांसद प्रधानमन्त्री निर्वाचनमा अनुपस्थित रहेका थिए । यो सबै संख्या जोड्दा संविधान संशोधनका लागि पर्याप्त हुने राजपाको भनाई छ ।
राप्रपालाई विश्वासमा लिइयोस्
महतोले संविधान संशोधनका लागि राप्रपालाई सरकारले विश्वासमा लिनुपर्ने बताए । ‘राप्रपाको ३७ भोट संशोधनका पक्षमा ल्याउन सरकाले पहल गर्नुपर्छ,’ उनले भने, ‘सरकारले त्यो काम गर्यो भने संविधान संशोधन हुन्छ, त्यो कुरा सरकारमा निर्भर छ ।’ संविधान संशोधनका विषयमा दोहोरो चरित्र नदेखाउन उनले सरकारसँग आग्रह गरे । संविधान संशोधन भयो भने त्यसको जस आफूले लिने अनि संशोधन भएन भने त्यसको दोष एमालेलाई दिने रबैया नदेखाउन पनि उनले कांग्रेस र माओवादीलाई सचेत गराए ।
अहिलेको समस्या समाधान भएन भने २०७४ माघ ७ गते यो संविधान असफल हुने उनले जिकिर गरे ।
