खोटाङ, २२ असार । खोटाङका रुपाकोट मझुवागढी नगरपालिका–१४ बुइपास्थित जगदम्बा मावि खिरीका विद्यार्थीले जिल्ला शिक्षा अधिकारीलाई विद्यालयमै बोलाई आफ्नै शिक्षकहरुको टिप्पणी गरेका छन् । विद्यालयका विद्यार्थीहरुले जिल्ला शिक्षा अधिकारी ज्ञानमणि नेपाललाई फोन गरी विद्यालयमा बोलाई शिक्षकहरुले वेवास्ता गरेको जानकारी गराएका हुन् । शिक्षकहरु समयमा विद्यालय नआउने, चार बजे अगावै विद्यालय छाड्ने, कक्षा नलिने, मादक पदार्थ सेवन गरेर विद्यालय आउने, आफ्नो कुरा नसुन्ने, बिद्यार्थीलाई अनावश्यक गाली गर्ने, कुटपिट गर्ने जस्ता कार्य गर्न थालेपछि विद्यार्थी जिशिअलाई फोन गरी गोप्य रुपमा विद्यालयमा बोलाएका थिए ।गलत शिक्षकहरुलाई पटक–पटक गुनासो राख्नुका साथै प्रधानाध्यापकलाई जानकारी गराउँदासमेत बेवास्ता गरिएपछि जिशिअलाई नै बोलाउनुपरेको विद्यार्थीहरुले बताए । जिशिअ, प्रधानाध्यापक, ब्यवस्थापन समितिका पदाधिकारी, अभिभावक तथा विद्यार्थीबीचमा आकस्मिक रुपमा भएको अन्तरक्रियामा विद्यार्थीहरुले शिक्षकको लापर्बाहीबारे जानकारी गराएका थिए । केही शिक्षक कक्षा छाडेर राजनीतिक गतिबिधिमा संलग्न हुन जाने गरेको विद्यार्थीहरुले स्पष्ट गरेका छन् ।
केही शिक्षकहरु सानातिनादेखि ठुला भोजमा जान विद्यालय नै बन्द गर्ने गरेको पनि विद्यार्थीहरुले खुलासा गरेका थिए । छड्के निरीक्षणका रुपमा जिशिअ आएपछि विद्यार्थीहरु एक भएर विद्यालयको बेथितिबारे जानकारी गराएका हुन् । शिक्षकहरुको नामै किटान गरेर विद्यार्थीहरुे शिक्षकको चरित्रबारे स्पष्ट पारेपछि शिक्षकहरु कालोनिलो भएका थिए ।
विद्यार्थीले शिक्षकहरुको गलत गतिविधिबारे जानकारी गराएर बोलाएपछि जिशिअ नेपालले स्रोतब्यक्ति दिन बिनोद दाहाललाई विद्यालय निरीक्षण गर्न पठाएका थिए । तर दाहाल आरपी विद्यालय निरीक्षणमा नगएपछि जिशिअ आफै छड्के निरीक्षणमा गएका थिए ।
बिभिन्न कारण कार्यशैलीमा सबै पक्षबाट केही गल्तीहरु भएको स्विकार गर्दै आगामी दिनमा सुधारको लागि प्रयत्न गर्नुे प्रधानाध्यापक गोपालप्रसाद घिमिरेले प्रतिवद्धता जनाएका छन् । बिद्यालयमा माध्यमिक तहका लागि कुनै पनि शिक्षक दरबन्दी नभएको अभिभावकले जनाएका छन् । ०२० सालमा स्थापना भई २०६५ सालदेखि माध्यमिक तह सञ्चालन हुन थालेको यो विद्यालयमा झण्डै दुई सय विद्यार्थी अध्ययनरत छन् ।
