बाढी प्रभावित गाउँमा सर्पको बिगबिगी, दैनिक १५ जना अस्पताल भर्ना

प्रकाशित समय 7:55:00 PM
सप्तरी,८ भदौ ।  बाढीका कारण डुबानमा परेका सप्तरीका एक दर्जन गाउँमा यति बेला विषालु सर्पको बिगबिगी बढेको छ । खाँडो नदी बस्ती भएर बग्न थालेपछि विषालु सर्पले हैरान पारेको हो । वर्षा रोकिएपछि बस्तीमा बाढीको पानी विस्तारै सुक्दै गएको अवस्थामा विस्थापितहरु घर फर्किन थालेका छन् । तर बाढीले तहस–नहस पारेको सप्तरीका सकरपुरा रम्पुरामल्हनियाँ, सकरपुरा, बेल्ही, हरिहरपुर, दिघवा, कमलपुर, मटिगढी, बिसहरिया, बोदरहट, पोर्ताहालगायतका स्थानहरुमा  विगत तीन दिनदेखि विषालु सर्पले डस्न थालेको साविक सकरपुरा गाउँ विकास समितिका पूर्व उपाध्यक्ष  सच्चिदानन्द झाले जानकारी दिए ।
पछिल्लो तीन दिनयता मात्र यस बस्तीका ८ जना सर्पको टोकाईबाट घाइते भएका छन् । सप्तरीको तिलाठी–कोइलाडी गाउँपालिका वडा नम्वर–३ मा पर्ने सकरपुरा बस्तीका सुदनी देवी मण्डल, वैजु राय, कन्हैया झा, हेल्दी देवी खंग, परमेश्वर मण्डल, राजा मुखिया, सुमित्रा मालीलगायतलाई सर्पले टोकेको छ ।
उनीहरुलाई उपचारार्थ राजविराज स्थित गजेन्द्रनारायण सिंह सगरमाथा अञ्चल अस्पतालमा भर्ना गरिएको थियो । अस्पताल भर्ना भएकाहरुमध्ये केही उपचार गराएर घर फर्किसकेका छन् । पछिल्लो पटक शनिबार राति सुदनी देवी मण्डललाई आफ्नै घरको ढोकामा करेत सर्पले टोकेको स्थानीय बासिन्दाले बताएका छन् । मण्डललाई अञ्चल अस्पतालमा भर्ना गरिए पनि चिन्ताजनक रहेकोले थप उपचारका लागि धरान स्थित विपी कोइराला स्वास्थ्य विज्ञान प्रतिष्ठान पठाइएको छ । दिनको समयमा सर्प त्यति नदेखिए पनि रातको समयमा खरको झुप्रो भएको घरहरुमा दिनहुँ जसो सर्प आउने गरेको स्थानीय स्वास्थ्यकर्मी दीपक कुमार देवले बताउनुभयो । बस्तीमा राति विद्युत समेत नहुँदा त्रासैत्रासमा रात काट्नु पर्ने बाध्यता रहेको उनले बताए ।
सकरपुरा बस्तीका बासिन्दाहरु त्रासदीपूर्ण अवस्थामा बस्नुपर्ने बाध्यता रहेको बाढी प्रभावित क्षेत्रमा राहत तथा उद्धार कार्यमा सक्रिय युवा समाजसेवी निरज कुमार झाले बताए । ‘सकरपुरा बस्तीमा अविलम्ब झुल, टर्चलाइट र आवतजावत गर्न बुटको व्यवस्था हुनु जरुरी छ‘ उनले भने ।
सकरपुरासहित जिल्लाभर नै सर्पको बिगबिगी बढेको गजेन्द्रनारायण सिंह सगरमाथा अञ्चल अस्पतालका आकस्मिक शाखाका डाक्टर रामकुमार दियालीले जानकारी दिए । बाढीका कारण एक सातायता दैनिकजसो अस्पतालमा १५ जनासम्म सर्पको टोकाईबाट घाइते भएर अस्पताल आउने गरेको अस्पतालका मेडिकल सुपरिन्टेन्डेन्ट दयाशंकरलाल कर्णले जानकारी दिए ।

सम्बन्धित समाचार

नयाँ
« Prev Post
पुराना समाग्री
Next Post »