दश भन्दा बढीको ज्यान लिएको चितुवा खोज्न विशेषज्ञ टोली खटिए

प्रकाशित समय 8:33:00 PM
अर्घाखाँची, २१ असोज । गाउँ पसेर १० भन्दा बढी मानिसको ज्यान लिने चितुवा नियन्त्रणमा लिन चितवन राष्ट्रिय निकुञ्जबाट आएको टोलीले काम सुरु गरेको छ । शुक्रबार सन्धिखर्क आएको टोलीले शनिबारदेखि काम थालेको हो । जिल्ला प्रशासन कार्यालय, जिल्ला प्रहरी कार्यालय र जिल्ला वन कार्यालयको पहलमा चितवनबाट चितुवा नियन्त्रणमा लिने विशेषज्ञ सहितको टोली आएको जिल्ला वन कार्यलय अर्घाखाँचीका प्रमुख दीपक ज्ञवालीले बताए ।
नरभक्षी चितुवाले पछिल्लो ३ वर्षमा १८ बालबालिकालाई आक्रमण गरेको छ भने १० भन्दा बढीको ज्यान लिएको छ । पछिल्लो पटक गएको सोमबार सन्धिखर्क नगरपालिका–२ का कुर बेहोरेका अशोक नेपालीकी ८ वर्षीया छोरी प्रशन्ना नेपालीलाई चितुवाले खाएको थियो । चितुवा नियन्त्रणमा लिन ३० जना नेपाली सेना र ३० जना प्रहरी गरी ६० जनाको टोलीले दैनिक खोजी कार्य जारी राखेको भए पनि नियन्त्रण लिन सकेको छैन ।
जिल्ला सुरक्षा समितिको निर्णयबाट चितुवा नियन्त्रणमा लिन वा मार्न टोली परिचालन भएका हुन् । प्रमुख जिल्ला अधिकारी खिमराज भुसालका अनुसार रातको समयमा पनि चितुवाको खोजी भइरहेको छ । २÷३ क्लस्टर बनाएर घेरा हाली खोज्ने कार्य शनिबारदेखि सुरु भएको छ ।

सम्बन्धित समाचार

नयाँ
« Prev Post
पुराना समाग्री
Next Post »