सिरहा, १५ कार्तिक । विभिन्न मानवअधिकार तथा बालबालिकासग सम्वन्धित संघ सस्थाले सिरहामा प्रहरी हिरासतमै झुण्डिएर आत्महत्या गरेकी भनिएकी प्रियङ्का यादवको मृत्यु रहस्यमय रहेको भन्दै छानविन गर्न माग गरेका छन् । मानवअधिकार संरक्षण केन्द्र सञ्जाल, ओरेक नेपाल, इन्सेक लगायतका संघ सस्थाले घटना शंकास्पद भएकाले राष्ट्रिय मानवअधिकार आयोगलाई गम्भिर तरिकाले अनुगमन र अध्ययन गर्न माग गरेका हुन् ।बालिकाको पैताला र पिठ्युमा लठ्ठीको डाम र पिठ्युमा विद्युतिय यातना दिएको जस्तो देखिएको उनिहरुद्धारा जारी विज्ञप्तीमा भनिएको छ । साथै बालबालिकालाई पनि वयस्क थुनुवासगै राख्नु, हिरासतमा अखाद्य पदार्थ भेटिनु जस्ता कार्यले इलाका प्रहरी कार्यालय विष्णुपुरका प्रहरी नायब निरीक्षक शिब नारायण यादवको गम्भिर लापरवाही रहेको उल्लेख छ । भाईको हत्या आरोपमा प्रक्राउ परेकी प्रियङकाले कात्तिक १२ गते हिरासत भित्रकै शौचालयमा झुण्डिएर आत्महत्या गरेकी थिइन् । उनिसगै प्रक्राउ परेका अर्का १३ वर्षिय भवेश कुमार यादव भने अझै हिरासतमा रहेका छन् ।
