भारतमा जीवित जन्मिए दुई टाउको एक शरीर भएका बच्चा, तर २४ घन्टापछि मृत्यु

प्रकाशित समय 9:11:00 AM
काठमाडौं, १५ कार्तिक । भारतमा दुई टाउको र एक शरीर भएका बच्चा आश्चर्यजनकरुपमा जीवित जन्मिए । तर, २४ घन्टापछि उनीहरुको मृत्यु भएको छ । जन्मनासाथ उनीहरुलाई भेन्टिलेटरमा राखिएका थियो । तर, डाक्टरहरुले बच्चाका बाबुआमालाई पहिल्यै उनीहरुको बाँच्ने सम्भावना क्षीण रहेको बताएका थिए ।
लाखौंमा एक मानिने दुर्लभ जुम्ल्याहाको तौल ३.७ किलो थियो । उनीहरुको हातगोडा र कलेजो एउटै थियो भने मुटु र फोक्सो अलगअलग थिए । बच्चाका बाबुआमाले आफ्नो सन्तालाई बचाउन डाक्टरहरुसँग याचना गरेको तर, डाक्टरहरुले यस्ता बच्चा बाँच्ने सम्भावना नरहने बताएको भारतीय सञ्चारमाध्यमले जनाएका छन् ।
उनीहरु बाँचेका भए पनि सर्जरीबाट अलग गर्ने सम्भावना नरहेको डाक्टरहरुको भनाइ छ । दुईवटा टाउको र एउटा शरीर भएका बच्चा अत्यन्तै दुर्लभ मानिन्छन् । यस्ता बच्चाहरु १० लाखमा १ जना मात्र हुन सक्ने बताइन्छ ।
पश्चिमी भारतको महाराष्ट्रमा रहेको एक सरकारी अस्पतालमा गत २९ अक्टोबरमा बच्चा जन्मेका थिए । उनीहरुकी ३२ वर्षीया आमाले स्थानीयहरुले मजाक बनाउलान् भन्ने डरले आफ्नो परिचय गोप्य राख्न चाहेकी छिन् ।
गर्भाधारणको ३२ औं हप्तामा महिलाले अल्ट्रासाउन्ड गराउँदा मात्र पेटभित्रका बच्चाहरु असामान्य रहेको पत्ता लागेको थियो । अस्पतालका गाइनोकोलोजी विभाग प्रमुख डा. संजय बान्सोडेले बच्चाहरु स्वस्थ अवस्थामा जन्मिएको तर उनीहरु जीवित रहन सक्ने सम्भावना नरहेको बताए । ‘यस्ता बच्चाहरु प्राय मृत जन्मिन्छन् । उनीहरु जीवित जन्मिनु एकदमै अप्रत्याशित थियो,’ उनले भने ।
अन्य विशेषज्ञहरुले पनि यस्ता प्रकारका जोडिएका जुम्ल्याहाहरु अत्यन्तै दुर्लभ हुने बताएका छन् । यो जोडीका यसअघि तीन छोरी र एक छोरा छन् । उनीहरु अत्यन्त विपन्न परिवारका हुन् ।

सम्बन्धित समाचार

नयाँ
« Prev Post
पुराना समाग्री
Next Post »