ट्रान्सफर्मर प्रकरणमाथि फेरि छानबिन

प्रकाशित समय 8:32:00 AM
कृष्ण ज्ञवाली
काठमाडौं, १९ कार्तिक । अख्तियार दुरुपयोग अनुसन्धान आयोगले बहुचर्चित ट्रान्सफर्मर अनियमितता प्रकरणमाथि फेर छानविन सुरु गरेको छ । विवादास्पद प्रमुख आयुक्त लोकमानसिंह कार्कीको पालामा ३ वटा मुद्दा चलेर अस्वभाविकरुपमा रोकिएको फाइलमाथि चार वर्षपछि फेरि छानबिन सुरु भएको हो । छानबिनका क्रममा अख्तियारले आईतबार पूर्व–मुख्यसचिव राजेन्द्रकिशोर क्षेत्रीसहित ३ जनासँग बयान लिएको अख्तियार उच्च स्रोतले बतायो ।
‘गुणस्तरहीन ट्रान्सफर्मर खरिद प्रकरणमा मुद्दा चलेको अर्को महिनामा नै यी पदाधिकारीहरुले गैरकानूनी रुपमा आर्विटेसन (मध्यस्थता) लगायतको निर्णय गरेर राज्यकोषमा नोक्सानी पु¥याएको अनुसन्धानका क्रममा भेटियो’ अख्तियार स्रोतले भन्यो, ‘उनीहरुको बयान चलिरहेको छ । उनीहरुले आफ्नो कामको औचित्य पुष्टि गर्न नसके भ्रष्टाचारको आरोपको सामना गर्नुपर्नेछ ।’
अख्तियारस्रोतका अनुसार आईतबार ऊर्जा सचिवका हैसियतले नेपाल विद्युत प्राधिकरणको अध्यक्ष भएका क्षेत्रीसहित पूर्वसचिव विश्वप्रकाश पण्डित र प्राधिकरणका पूर्व कार्यकारी निर्देशक अर्जुन कार्कीसँग पनि बयान लिएको छ । पण्डित उर्जा सचिव हुँदा प्राधिकरणको बोर्डमा थिए । २०७० साल भदौं २९ गते ट्रान्सफर्मर अनियमितता प्रकरणमा मुद्दा चलाउने भनी अख्तियारले निर्णय गरेकोमा अर्को महिना नै प्राधिकरणबाट आर्विटेसनको निर्णय भएको थियो । अर्कोवर्ष क्षेत्रीले त्यस्तै विवादास्पद निर्णय गरेका थिए । विवादित निर्णयका कारण करिब ३ करोड रुपैंयाँको हाराहारीमा अनियमितता भएको प्रारम्भिक अनुसन्धानको निष्कर्ष छ ।
कार्कीको संरक्षणमा कार्की 
लोकमानसिंह कार्की अख्तियारको प्रमुख आयुक्त हुनासाथ दायर भएको ट्रान्सफर्मर भ्रष्टाचार प्रकरणमा गत चैतमा विशेष अदालतले भ्रष्टाचार भएको ठहर ग¥यो । चारवटा भ्रष्टाचार मुद्दामा अख्तियारले एक अर्ब ६ करोड रुपैंयाँ बिगो मागदाबी गरेकोमा विशेष अदालतले ४६ करोड १७ लाख रुपैंयाँ भ्रष्टाचार भएको ठह¥याएको थियो । तर झण्डै आधा दर्जन टेण्डर र खरिदको फाइलमा हात हालेको अख्तियारले अर्जुन कार्की मुछिएको घटनामा भने फाइल नै खोलेको थिएन ।
सबैभन्दा बढी चुहावट भएको ट्रान्सफर्मर खरिद प्रकरणको फाइल चार वर्षदेखि अख्तियारमा थन्किएको छ । भारतीय कम्पनी एसभीआरबाट खरिद भएको ६४० थान ट्रान्सफर्मर र त्यसमा भएको अनियमिततामा तत्कालीन कार्यकारी निर्देशक कार्की जोडिएका थिए ।
छानबिनमा परेकामध्ये थाइल्याण्डको सहवान्त र चीनको हुवावे सनलाईट कम्पनीको ट्रान्सफर्मर खरिदमा भ्रष्टाचार भएको निष्कर्षसहित अख्तियारले मुद्दा चलाएको थियो । सबैभन्दा बढी विद्युत चुहावट र अनियमितता भएको भनी ल्याब परीक्षणबाट प्रमाणित भएको एसभीआर कम्पनीको टेण्डरका क्रममा भएको अनियमितता छानबिन भएको थिएन ।
अख्तियार स्रोतका अनुसार यही घटनामा सोमबार प्राधिकरणका सञ्चालक समितिका पदाधिकारी सन्तोषनारायण श्रेष्ठ, लक्ष्मण अग्रवाल, मनोज मिश्र, रामचन्द्र पाण्डे र विवेक तातेडसँग बयान लिने योजना रहेको स्रोतले बतायो ।
थप चारसँग बयान 
अख्तियारले गैरकानूनी सम्पति आर्जन गरेको अभियोगमा पूर्व–प्रहरी महानिरीक्षक उपेन्द्रकान्त अर्यालसहित चार जनासँग आईतबार बयान लिएको छ । अख्तियारले अर्यालसहित सचिव गजेन्द्र ठाकुर, काठमाडौं महानगरपालिकाका दुई डीएसपीहरु धनपती सापकोटा र राजुनाथ पाण्डेसँग बयान लिएको हो ।
उनीहरुको बयान जारी रहने अख्तियार स्रोतले बतायो । उनीहरुमाथि वैध आर्जनको तुलनामा बढी सम्पत्ति आर्जन गरी अस्वभाविक जीवनयापन गरेको आरोप छ ।

सम्बन्धित समाचार

नयाँ
« Prev Post
पुराना समाग्री
Next Post »