साउदीमा मृत्युदण्ड पाएका नेपालीलाई पाकिस्तानी परिवारबाट माफी

प्रकाशित समय 2:39:00 AM
होम कार्की
काठमाडौँ, १२ वैशाख । साउदी अरबमा मृत्युदण्डको सजाय पाएका धनुषाका उमेश यादवलाई पीडित परिवारले बुधबार माफी दिएका छन् । पाकिस्तानी नागरिकको हत्या गरेको अभियोगमा यादव जुवेल जेलमा बसिरहेका छन् । 
पाकिस्तानको फैसलवादस्थित पीडित परिवारको घरमा पीडित पक्ष र उमेशका तर्फबाट क्षमा माग्न पुगेका सरोज रायबीच सौहर्दापूर्ण छलफल भएपछि पीडित पक्ष उमेश यादवलाई माफी दिन तयार भएको हो । पीडित पक्षलाई पीडक पक्षले ब्लडमनि दिन तयार भएको छ । ब्लडमनिबापतको रकम खुलाइएको छैन ।
११ वर्षअघि यादवलाई पाकिस्तानी नागरिक मोहम्मद लकी वासिफको हत्या गरेको आरोप लागेका थिए । ६ वर्षअघि नै स्थानीय अदालतले उनलाई मृत्युदण्ड दिने फैसला गरेको थियो । मोहम्मदका दाजु सफिकले आफूहरुलाई ठूलो पीडा भए पनि माफी दिएको बताए। ‘हामीलाई ठूलो पीडा छ । हामीसँग राम्रो भएन । फेरि पनि अल्लाहलाई साक्षी राखी माफी दियौं, उनले भने ।
दुई परिवारबीच मेलमिलापको लागि भूमिका खेलेका पाकिस्तानी वकिल मुहम्मद नुक्वासले पीडित पक्षले माफी दिएर पाकिस्तानीहरु ठूलो दिल भएको नागरिक भएको प्रमाणित गरेको बताए । ‘हामी पाकिस्तानी निकै ठूलो दिल भएको मानिस हौं । यसलाई पीडित पक्षले पुष्टि गरेको छ, उनले भने ।
उमेशलाई क्षमा दिनको लागि काठमाडौंबाट फैसलवाद पुगेका सरोज रायले आफ्नो मिसन पूरा भएको भन्दै खुसी ब्यक्त गरे । ‘अन्तत ः हामी उमेशलाई मृत्युदण्डबाट बचाउन सफल भयौं । पीडित परिवारले ब्लडमनि स्वीकार गरेका छन् । त्यसबारे पछि बताउनेछौं, उनले भने, ‘यहाँसम्म आउन साथ दिने सबै साथीभाइप्रति आभरी ब्यक्त गर्दछु ।
पीडित परिवारलाई भेटाउनका पाकिस्तानी नागरिक जनाव जैइब कलमटयी र फरान अदिललगायतले सहयोग गरेका थिए । जनकपुस्थित युवा संघका मोहम्मद रियाज साफीले समन्वय गरेका थिए ।

सम्बन्धित समाचार

नयाँ
« Prev Post
पुराना समाग्री
Next Post »