सडकको फोहोर उठाएर लहान नगर कार्यालयमा थुपारे

प्रकाशित समय 1:26:00 AM
सन्तोष यादव
लहान, १९ साउन । प्रतिपक्षी दल नेपाली कांग्रेसका भातृसंगठन नेपाल विद्यार्थी संघ (नेविसंघ) र तरुण दलका कार्यकर्ताले लहान नगरपालिका राजमार्ग क्षेत्रको फोहोर उठाएर नगरपालिकाको कार्यालय परिसरमा थुपारेका छन् । नगरपालिकाले सरसफाई नगरेको विरोधमा नेविसंघ र तरूण दलले यसो गरेका हुन् ।
शनिबार बिहान राजमार्ग क्षेत्रबाट संकलन गरिएको दुई ट्र्याक्टर फोहोर नगरपालिकाको मुख्यद्वार र परिसरमा थुपारिएको छ। नगरपालिकाले सरसफाई कर लिने तर फोहोर नउठाउने गरेको विरोधमा फोहोर उठाएर नगरपालिकामा फालेको नेविसंघका केन्द्रीय सदस्य अशोक चौधरीले बताए । उनले सडक खाली गराउने बहानामा १८ दिनदेखि फोहोर नउठाएर मेयरले नगरबासीको स्वास्थ्यसँग खेलवाड गरेको आरोप लगाए । चौधरीले अबपनि फोहोर नउठाए नगरपालिकामा तालाबन्दी गर्ने चेतावनी दिए ।


राजमार्ग क्षेत्र खाली गराउने बिषयमा सडक विभागसँग भएको आन्तरिक विवादका कारण लहानका मेयर मुनी साहले फोहोर नउठाउन कर्मचारीलाई निर्देशन दिएका थिए। १८ दिनसम्म फोहोर नउठेपछि जताततै फोहोर थुप्रिएर राजमार्ग क्षेत्र कुरुप बनेको छ। नेविसंघ र तरुण दलले विरोध स्वरूप केहि भागको फोहोर मात्र उठाएर नगरपालिकामा लगेका हुन् । फोहोरले लहान दुर्ग्न्धित बनेर महामारी फैलिने खतरा बढेको छ ।
मेयर साह भने सात दिनका लागि भ्रमणमा गएका छन् । मेयरले फोहोर नउठाउन आदेश दिएका कारण सरसफाई गर्ने कर्मचारी हरू त्यत्तिकै बसिरहेका छन् ।

सम्बन्धित समाचार

नयाँ
« Prev Post
पुराना समाग्री
Next Post »