सिरहामा भेटियो पहिलो कोरोना संक्रमित

कमलेश कुमार यादब

लहान, ३ जेठ । कोरोना भाइरसको संक्रमण फैलिएको ५३ आंै दिन शुक्रबारसम्म प्रदेश २ अन्तर्गतका अन्य जिल्लामा संक्रमतिको संख्या एक सयको हाराहारी पुगेपछि सिरहामा पहिलो संक्रमित भेटिएका छन् ।  

सिरहाको सखुवानन्कारकट्टी गाउँपालिका १ का ३० वर्षीय व्यक्तिमा कोरोना संक्रमण पुष्टि भएको हो । पछिल्लो २८ फागुनमा वैदेशिक रोजगारी अन्तर्गत मलेसियाबाट फर्किएर घरमै बसिरहेका उनलाई ३० वैसाखमा भगवानपुर पुर्याएर पिसिआर परीक्षणका लागि स्वाब दिन लगाइएको जनाइएको छ । वैदेसिक रोजगारीबाट फर्किएकाले क्वारेण्टाइनमा बस्न आग्रह गरेपनि शारीरिक अवस्था सामान्य रहेकाले घरमै बसेर सामान्य कामधन्दा गरिरहेको स्थानीयले बताए । 

‘स्वाब परीक्षणका लागि जान भन्दा पनि नमानेपछि हलो जोतिरहेका बेला समातेर लगिएको थियो’ उनले भने ‘उनलाई भगवानपुरसम्म लैजाने व्यक्ति, सम्पर्कमा रहेका परिवारका सदस्यहरु, गाउँलेमा पनि संक्रमण फैलिएको हुन सक्ने आशंका छ ।’

जिल्ला विपद् व्यवस्थापन समितिको निर्णय अनुसार गत वैसाखको २९ र ३० गते जिल्लाका आठ ठाउँमा पिसिआर परीक्षणका लागि संकलन गरिएको एक सय ६८ जनामध्ये शनिबार बिहानसम्म आएको १८ जनाको रिपोर्ट मध्ये उनमा संक्रमण पुष्टि भएको स्वास्थ्य कार्यालय सिरहाले जनाएको छ । स्वास्थ्य कार्यालयका भेक्टर कन्ट्रोल निरीक्षक अन्देश्वर चौधरीका अनुसार संकलन गरिएको स्वाबको राष्ट्रिय जनस्वास्थ्य प्रयोगशाला टेकुमा गरिएको पिसिआर परीक्षणमा संक्रमण पुष्टि भएको हो । संक्रमितलाई धनगढीमाई ११ छपराढीस्थित महेन्द्र गेनाई स्मृति प्रसूति तथा बाल कल्याण अस्पतालमा सञ्चालित कोरोना विशेष अस्थायी अस्पतालको आइसोलेसनान राखिएको चौधरीले बताए ।  

प्रदेश २ मा एक सय संक्रमित

सिरहामा शनिबार एक जनामा भाइरस संक्रमण पुष्टि भएसँगै प्रदेश २ का ८ जिल्लामै कोरोना भाइरसको संक्रमण पुष्टि भएको हो । प्रदेश २ को सामाजिक विकास मन्त्रालय अन्तर्गत कोभिड १९ नियन्त्रण तथ रोकथाम कार्यक्रमका फोकलपर्सन बरिष्ठ जनस्वास्थ्य अधिकृत विजय झाका अनुसार शुक्रबार साँझसम्मको अद्यावधिक तथ्यांक अनुसार प्रदेश २ मा सबैभन्दा बढी पर्सामा ८२ जना र सबैभन्दा कम सिरहामा एक जना संक्रमित पुष्टि भएको छ । 

फोकलपर्सन झाले सप्तरीमा एक, धनुषामा तीन, महोत्तरीमा दुई, सर्लाहीमा दुई, रौतहट तीन, बारामा तीन जनामा संक्रमण पुष्टि भएको बताए । प्रदेश अन्तर्गतका आठ वटै जिल्लमा शुक्रबारसम्म पिसिआर परीक्षणका लागि चार हजार नौ सय ८० जनाको स्वाब संकलन र पाँच हजार पाँच सय १७ जनाको आरडिटी जाँच गरिएको उनले बताए । 

लकडाउनको प्रकोपबाट जोगिन अदालतमा भिडियो कन्फ्रेन्स

सन्तोष सुवेदी

सिरहा,१ जेठ । कोरोना भाइरसको बढ्दो संक्रमणको बेला यसलाई नियन्त्रण गर्न नेपाल सरकारले घोषणा गरेको लकडाउनको समयमा भीड जम्मा हुन नदिने उद्देश्यले सिरहा जिल्ला अदालतले साधारण कार्य समेत भिडियो कन्फ्रेन्सबाट गर्ने काम थालनी गरेको छ ।

सिरहा जिल्ला अदालतले लकडाउनको अवधिभरी फौजदारी अभियोगको अनुसन्धानको लागि गर्नुपर्ने नियमीत प्रक्रिया अन्तर्गत जरुरी पक्राऊ पूर्जीको समर्थन, पक्राउ पूर्जीको अनुमति तथा म्याद थपको अनुमति पनि गत वैशाख ३० गतेदेखि भिडियो कन्फ्रेन्सबाटै दिने व्यवस्था मिलाएको छ । भिडियो कन्फ्रेन्सको व्यवस्था नहुँदा यी कार्य गर्न समेत थुनुवाहरुलाई जिल्लाको विभिन्न प्रहरी कार्यालयबाट सिरहा सदरमुकामस्थित सिरहा जिल्ला अदालत ल्याउनुपर्ने बाध्यता थियो ।

यसभन्दा अघि कोरोना संक्रमणलाई मध्यनजर गर्दै सिरहा जिल्ला अदालतमा गत चैत ९ गतेदेखि वन्दीप्रत्यक्षीकरणको निवेदनको सुनुवाई, अभियोगपत्र दर्ता, वयान, थुनछेक, पक्राऊ पूर्जीको अनुमति, जरुरी पक्राऊ पूर्जीको समर्थन, म्याद थप, कोरोना भाइरससम्बन्धि गम्भीर प्रकृतिको निवेदन, वाल सुधारगृहमा रहेका वालवालिकालाई अभिभावकले बुझिलिन चाहेमा सो सम्बन्धी निवेदन तथा एक वर्षभन्दा मुनि कैद सजाय पाएको कैदीलाई कैद बराबरको रकम भुक्तान गरी कैदबाट छुटकारा पाउने सम्बन्धी निवेदनबाहेक सम्पूर्ण अदालती प्रक्रिया तत्कालका लागि स्थगित गरिएको सिरहा जिल्ला अदालतका श्रेस्तेदार नरेन्द्र श्रेष्ठले जानकारी दिनुभयो ।

फोटो खिचेको निहुँमा सञ्चारकर्मीमाथि कुटपीट

एम महतो 

सिरहा,१ जेठ  । सिरहा सदरमुकाममा लकडाउन उल्लङ्घन गर्नेमाथि कारबाही गरिरहेको फोटो खिचेका स्थानीय सञ्चारकर्मी बद्रिनारायण यादवलाई कुटपीट गर्ने नेपाली सेनाको टोलीलाई कारबाही गर्न नेपाल पत्रकार महासङ्घ सिरहाले माग गरेको छ ।

सिरहा सदरमुकामस्थित चन्द्र माध्यमीक विद्यालयको दक्षिणतर्फको सडकमा बुधबार ११ः३० बजे नेपाली सेनाको एक टोलीले लकडाउन उल्लङ्घन गर्नेमाथि कारबाही गरिरहेको फोटो खिचेपछि खटिएको टोलीका कमाण्डरले सञ्चारकर्मी यादवलाई बोलाएर कुटपीट गरेको पीडित सञ्चारकर्मीले बताउनुभयो । 

‘विद्यालयको दक्षिणतर्फ रहेको मूल सडकमा भीडभाड जम्मा भइरहेको थियो, त्यहाँ नेपाली सेनाको टोली आएर मानिसको भीडभाडलाई तितरबितर गर्दै लकडाउन पालना गराइरहेको देखियो’, पीडित सञ्चारकर्मी यादवले भन्नुभयो–‘लकडाउनलाई कडाई पार्न सुरक्षा अङ्गले गरेको भूमिकालाई चित्रण गर्न मैले फोटो खिंचे तर सेनाको फोटो किन खिंचेको भन्दै कमाण्डरले बोलाएर मलाई पाइपले कुटपीट गर्न थाले ।’ 

सैनिक कमाण्डरले बोलाउँदा आफूले पत्रकारको परिचयपत्र समेत देखाएको उल्लेख गर्दै पत्रकार हो भन्दै जानीजानी कुटपीटपछि आफूलाई केही बेर घाममा समेत उभ्याएर यातना दिएको पीडित सञ्चारकर्मी यादवले गुनासो गर्नुभयो । सेनाबाट कुटाई खानुभएका सञ्चारकर्मी यादव नेपाल पत्रकार महासङ्घ सिरहाका कार्यकारिणी सदस्य तथा नवजागृति साप्ताहिकका कार्यकारी सम्पादक हुनुहुन्छ । यादवमाथि कुटपीट गर्ने सैनिक कमाण्डर तथा टोलीलाई कारबाही गर्न महासङ्घ सिरहा शाखाले विज्ञप्ती प्रकाशित गर्दै माग गरेको छ ।

‘कोरोना भाइरसको संक्रमण बढिरहेको बेला लकडाउनलाई प्रभावकारी बनाउन नेपाली सेनाको कार्य सकारात्मक हो र लकडाउनलाई प्रभावकारी बनाउन सूचना सङ्कलन तथा सम्प्रेषण गर्ने सञ्चारकर्मीको कार्य पनि उत्तिकै महत्वपूर्ण हो’, सिरहाका सभापति दिनेश्वर प्रसाद गुप्ताद्वारा हस्ताक्षरित उक्त विज्ञप्तीमा भनिएको छ–यस्तो अवस्थामा जुनसुकै पक्षले प्रेस स्वतन्त्रतामाथि हमला गर्ने कार्य निन्दनीय हो, त्यसैले सञ्चारकर्मी यादवमाथि कुटपीट गर्ने र शारीरिक यातना दिनेलाई कारबाहीको दायराभित्र ल्याउनुपर्छ ।

सिरहाका प्रमुख जिल्ला अधिकारी सरोज गुरागाईंले सञ्चारकर्मीमाथि भएको उक्त घटना दुखदायी भएको उल्लेख गर्दै यस सम्बन्धमा चोहर्वास्थित बहादुर श्री शेर गणका गणपतिसँग कुराकानी गरेको र उहाँले यसबारेमा अनुसन्धान गरिने जानकारी दिनुभयो ।

फोटो ः बद्रि सेनाको टोलीद्वारा कुटिएका पत्रकार यादव ः सिरहा सदरमुकामस्थित चन्द्र माध्यमिक विद्यालयको दक्षिणतर्फको सडकमा बुधबार विहान ११ः३० बजे लकडाउन कार्यान्वयन गराउँदै गरेको फोटो खिचेको आरोपमा नेपाली सेनाको टोलीद्वारा सञ्चारकर्मी बद्रिनारायण यादवमाथि भएको कटपीट ।

बिपन्नलाई कांग्रेसको राहत

एम महतो

लहान, १७ वैशाख । कोरोना भाइरस (कोभिड १९) को कारणले चैत ११ गतेदेखि शुरु भएको  कडाउनले अप्ठ्यारोमा परेका अति बिपन्न, दैनिक ज्यालादारी परिवारलाई नेपाली कांग्रेस सिरहाले राहत वितरण थालेको छ ।

सिरहा धनगढीमाई नगर कार्यसमितिले पार्टीका सहृदयीहरुको आर्थिक सहयोगमा जोहो गरेको चामल, दाल र नुन वितरण थालेको हो । धनगढीमाई ११ सोनापुरमा बुधबार छ वटा वडालाई राहत सामग्री हस्तान्तरण गरिएको छ । राहत सामग्रीमा प्रति परिवार साढे १२ किलो चामल, एक÷एक किलो दाल र नुन छ । 

नेपाली कांग्रेसका सिरहा सभापति तथा पूर्व सभासद् रामचन्द्र यादव, जिल्ला सचिव तथा महासमिति सदस्य पञ्चलाल महतोको उपस्थितिमा धनगढीमाई २, ३, ४, ७, १० र ११ नं. वडामा गठन गरिएको पार्टी अन्तर्गतको राहत व्यवस्थापन समितिलाई राहत सामग्री हस्तान्तरण गरिएको छ । राहत हस्तान्तरण गर्दै जिल्ला सभापति यादवले नगर क्षेत्रका पार्टी समर्थक, सहृदयीहरुले दिएको २९ लाख रुपैयाँबाट खरिद गरिएको चामल, दाल र नुन नगरको १ देखि १४ वडा क्षेत्रका अति बिपन्न, दैनिक ज्यालादारी परिवारलाई दिइने बताए । 

महासमिति सदस्य महतोका अनुसार राहतका लागि तीन सय क्वीण्टल चामल, २० क्वीण्टल मसुरोको दाल र तीन हजार किलो नुन खरिद गरिएको छ । ‘वडा कार्यालयसँग समन्वय गरी पहिचान गरिएका तीन हजार परिवारलाई वडा स्तरीय समितिले वितरण गर्नेछ’ उनले भने ‘हरेक वडाका वडाध्यक्ष, पार्टीका अगुवा, अन्य राजनीतिक दलका प्रतिनिधिहरुसँग समेत समन्वय गरी पहिचान गरिएका परिवारलाई राहत दिन्छौं, त्यसमा पार्टीगत रुपले काखापाखा हुँदैन ।’

  स्थानीय युवा नेता अरुण यादवले विपद्को समयमा नगरपालिकाले राहत बाँडेको भएपनि छुटेका अति बिपन्नलाई राहत दिने योजना अन्तर्गत राहत सामग्री वडा स्तरीय समितिको जिम्मा लगाइएको बताए । कोरोना महामारीको संकटको बेलामा विशुद्ध मानवीय रुपले सहयोग गर्न धनगढीमाईसहित लहान, मिर्चैया र अन्य स्थानीय तहमा पनि पार्टीमार्फत् राहत वितरण थालिएको उनको भनाई छ ।